Psykologisk institutt

Om stillinga

Det samfunnsvitskaplege fakultet, Psykologisk institutt, søkjer ein dyktig administrator i vikariat som studiekonsulent (førstekonsulent/seniorkonsulent SKO 1408/1363). Den som blir tilsett vil få studieadministrativt ansvar for andre halvdel av profesjonsprogrammet i psykologi. Vikariat er på eitt år og det er ønskeleg med snarleg oppstart i stillinga.

Psykologisk institutt er eit institutt med høg aktivitet. PSI er Norge sitt høgast rangerte miljø for psykologi, og våre forskarar hevdar seg med eit aktivt forskingsmiljø med høg søknadsaktivitet og ein innhaldsrik prosjektportefølje inkludert fleire ERC-prosjekt. Instituttet er i sterk vekst og får eit stadig meir internasjonalt miljø som stiller høge krav til vår administrasjon. Studietilbodet er eit av Noreg sine mest populære og omfattar ei årseining i psykologi, profesjonsstudiet i psykologi, samt eit bachelor- og mastergradsprogram. I tillegg har instituttet ei forskarutdanning (Ph.D.-grad). Stillinga vil inngå i instituttet sin studieseksjon med 10 tilsette og føreset eit tett samarbeid med programleiing, emneansvarlege, studentrepresentantar og dei tilsette i administrasjonen.

Arbeidsoppgåver

• Administrativ koordinering av den andre delen av profesjonsprogrammet, inkludert undervisningsplanlegging og administrativt arbeid knytt til studentane si praktiske trening i psykologrolla.
• Utarbeide og oppdatere informasjon om program og emne på programmet sine nettsider. Organisere mottak av studentar ved semesterstart, halde informasjonsmøte og drive studierettleiing.
• I samarbeid med fagleg programleiing hjelpe til med saksførebuing og oppfølging av programrådet sine vedtak.
• Halde oversikt over og levere informasjon til leiinga om ressursbruken på studieprogrammet.

Andre oppgåver kan bli lagt til stillinga dersom omsynet til instituttets verksemd tilseier dette. Vi ynskjer difor en person som er fleksibel og løysningsorientert som kan hjelpe til med å løyse instituttets oppgåver når det trengs.

Ved tilsetting som seniorkonsulent vil ein til stillinga kunne leggja til utviklingsoppgåver, koordinering av tenester, spesielt rettleiingsansvar og/eller andre oppgåver som føreset særleg spisskompetanse innan tilsvarande felt som førstekonsulent.

Kvalifikasjonskrav 

• Høgare utdanning på minimum bachelornivå. Dokumentert relevant realkompetanse kan kompensere for utdanningskravet
• Relevant arbeidserfaring.
• God skriftleg og munnleg framstillingsevne på norsk og engelsk

Kompetanse og erfaring som vil vere ein fordel:

• Erfaring frå studieadministrativt arbeid
• Erfaring og kjennskap til offentleg forvaltning og UH-sektoren
• Kjennskap til og erfaring med UiO-arbeidsverktøy, mellom anna Felles Studentsystemt (FS), Canvas og TP, DFØ-system, ePhorte m.m.

Plassering i stilling som seniorkonsulent eller førstekonsulent vil avhenge av kompetanse og erfaring. For å tilsettast som seniorkonsulent føreset det omfattande relevant erfaring tilpassa stillinga sine funksjonar.

Personlege eigenskapar

• Du har gode samarbeids- og koordineringseigenskapar
• Du er ansvarsbevisst, strukturert og sjølvstendig.
• Du kan tenke langsiktig og er flink til å planlegge
• Du kan handtere periodar med høgt arbeidspress
• Du bidreg til eit godt arbeidsmiljø.

Det vil bli lagt vekt på at ein er personleg eigna til stillingane.

Vi tilbyr

• Ein spanande arbeidsplass med hyggelege kollegaer, både administrativt og vitskapleg tilsette
• Løn som førstekonsulent (SKO 1408), kr 532 200 - 575 400 pr år, løn som seniorkonsulent (SKO 1363) kr. 557 100 - 624 500 pr år, avhengig av kompetanse og erfaring
• Stilling i ei IA-verksemd
• Fleksibel arbeidstid og gode velferdsordningar
• Trening i arbeidstida
• God pensjonsordning og gunstig lån i Statens Pensjonskasse

Søknaden skal innehalde

• Søknadsbrev
• CV
• Evt. vitnemål, attestar, liste med 2-3 referansar (namn, tilknyting til søkjar, e-postadresse og telefonnummer)

Søknad (evt. med vedlegg) må sendast inn via rekrutteringssystemet vårt, Jobbnorge. Vitnemål/attestar må vere på norsk/skandinavisk språk eller engelsk. 

Andre opplysningar

Aktuelle søkjarar vil bli kalla inn til intervju.

I høve til offentleglova § 25, 2. ledd kan opplysningar om søkjaren bli offentleggjorde sjølv om søkjaren har bede om ikkje å bli oppført på søkjarlista.

UiO har eit personalpolitisk mål om å oppnå ei balansert kjønnssamansetjing og rekruttere personar med innvandrarbakgrunn.

Inkludering og mangfald er ein styrke. UiO har eit personalpolitisk mål om å oppnå ei balansert kjønnssamansetjing. Vidare ønskjer vi medarbeidarar med ulike kompetansar, fagkombinasjonar, livserfaring og perspektiv. Vi vil leggje til rette for medarbeidarar som har behov for det. 

Om det er kvalifiserte søkjarar med funksjonsnedsetjing, hol i CV-en eller innvandrarbakgrunn, skal vi kalle inn minst éin søkjar i kvar av desse gruppene til intervju.

Kontaktinformasjon

• Tittel: Jostein Eikrem Koløen, tlf:22854288, e-post: j.p.e.koloen@psykologi.uio.no
• Tittel: Dordi Stavik, tlf: 22854498, e-post: dordi.stavik@psykologi.uio.no - Ved spørsmål om elektronisk søknad

Søk på stillingen